Dk. Shein ataka ushirikiano kupata ufumbuzi wa uhalifu

NA MWANDISHI WETU

14th August 2013

Rais wa Zanzibar, Dk. Ali Mohammed Shein (kushoto), akisalimiana na Waziri wa Katiba na Sheria Abubakary Khamis Bakari, alipowasili katika viwanja vya Hoteli ya Zanzibar Beach Resort nje ya mji wa Unguja, kufungua mkutano wa mwaka wa Jumuiya ya Mahakimu na Majaji wa Afrika Mashariki. Wengine ni Jaji Mkuu Jamhuri ya Muungano wa Tanzania, wa Mohamed Chande Othman, (wa pili kulia) na Jaji Mkuu wa Zanzibar, Omar Othman Makungu.

Rais wa Zanzibar, Dk. Ali Mohammed Shein, amesema ni wakati mwafaka kwa mahakama, vyombo vinavyosimamia utekelezaji wa sheria na jamii barani Afrika, kushirikiana kutafuta ufumbuzi wa tatizo la kuongezeka kwa vitendo vya kihalifu barani humo.

Alikuwa akizungumza wakati wa ufunguzi wa mkutano wa 11 wa Chama cha Majaji na Mahakimu cha Afrika Mashariki (EAMJA) unaofanyika Zanzibar. Dk. Shein alisema kumekuwapo na mjadala wa muda mrefu juu ya uhusiano wa ongezeko la vitendo hivyo na ufanisi wa utendaji kazi katika vyombo vinavyosimamia utekelezaji wa sheria.

Aliongeza kuwa tatizo hilo linatajwa kuwa miongoni mwa sababu zinazokwamisha maendeleo barani Afrika.

Dk. Shein aliwataka wanachama wa EAMJA kuendelea kufanya kazi kwa karibu na vyombo vinavyosimamia utekelezaji wa sheria pamoja na jamii ili kuhakikisha sheria zinatekelezwa ili haki itendeke.

Alivitaja baadhi ya vitendo vya kihalifu ambavyo vitachukua nafasi katika mijadala ya mkutano huo kuwa ni rushwa na unyanyasaji watoto.

Hata hivyo, Dk. Shein alisema Serikali ya Mapinduzi Zanzibar imejizatiti kupambana na tatizo la rushwa na imeunda mamlaka maalum ya kushughulikia suala hilo na uhalifu wa kiuchumi.

Katika mkutano huo, miongoni mwa masuala yatakayojadiliwa na kutarajiwa kuzua mjadala mkubwa ni pamoja na hukumu ya kifo na suala la utoaji mimba.

Masuala hayo yamekuwa yakichukua nafasi kubwa katika mijadala mbalimbali ya kisheria kutokana na kuwapo mitazamo tofauti na hoja mbalimbali zinazokataa au kuunga mkono zote zikihusisha haki za binadamu.

CHANZO: NIPASHE