ZANZIBAR KUFANYA MAANDAMANO MAKUBWA DHIDI YA WIZI WA ESCROW ACCOUNT!

 

Maandamano makubwa kufanyika Zanzibar kuwalaani 

wezi wa Tegeta Escrow Account!

(Zanzibar) - Habari zilizotufikia Wana-blog wa Zanzibar Ni Kwetu sasa hivi zinaeleza kuwa kutafanyika maandamano makubwa mjini Zanzibar katika wiki mbili zijazo ili kuwalaani wote wale waliolipwa fedha kutoka Tegeta Escrow Account.

Nia ya maandamano haya tunaelezwa sio kulaani kitendo hichi cha wizi tu, bali kuishinikiza serikali ya Muungano kuwataka wote waliolipwa hizi pesa haramu kuzirudisha, pamoja na kufukuzwa kazi kutoka serikalini na kwenye nyadhifa zozote zile, sio kwa Prof Muhongo, Maswi, Werema na Prof Tibaijuka tu, bali pia na Waziri Mkuu Pinda, Mzee Vijisenti, Mwambalaswa, Ngeleja, pamoja na wote wale waliopokea pesa hizi za haramu au kuzijua hizi njama za wizi kabla (Pinda). Pia, wafukuzwe kutoka kwenye chama. Chama cha CCM kisiwavumilie wezi wa mabilioni ya fedha!

Wananchi kwenye maandamano pia wataitaka serikali ya Muungano kuichukulia hii kesi kama ni kesi ya jinai na kwahivyo kuwachukulia hatua ya kuwapeleka kortini wote wale waliohusika na wizi huu.

Vyanzo vyetu vinaeleza kuwa maandamano hayatokuwa ya chama fulani bali ya Wazanzibari wote, kwani Zanzibar Ni Kwetu imeelezwa kwamba kuibiwa kwa serikali ya Muungano au kukosa kulipwa kodi kwa Serikali ya Muungano ni sawa sawa na kuibiwa au kukosa kulipwa kodi kwa Serikali ya Mapinduzi ya Zanzibar, kwasababu Serikali ya Mapinduzi ya Zanzibar inahaki ya 4.5% katika serikali ya Muungano.

Vyanzo vyetu vya habari vinaeleza zaidi kuwa waandamanaji pia wataitaka Serikali ya Muungano kupitia Benki Kuu ya Tanzania (BoT) kuifunga benki ya Mkombozi Commercial Bank na benki ya Stanbic Bank, ambazo zilisaidia katika wizi huu.