Wawili wauawa uporaji fedha za Vicoba Dar

Kamanda wa Polisi wa Temeke, Kihenya Kihenya.

 Watu wawili wameuawa katika tukio la  ujambazi wa kutumia silaha lililohusisha uporaji wa Sh. milioni nane, mali ya akinamama wajasiriamali waliojiunga kwenye Vicoba, jijini Dar es Salaam. 

 

Katika tukio hilo lililotokea jana, majambazi wanne wakiwa na silaha wakitumia pikipiki, walimpiga risasi ya mguuni dereva wa bodaboda aliyekuwa katika harakati za kuziokoa fedha hizo na kusababisha kifo chake wakati akikimbizwa hospitalini kutokana na kuvuja damu nyingi.

 

Tukio hilo la ujambazi lilitokea jana saa 2:30 usiku na kuendelea kwa takriban nusu saa katika eneo la Vijibweni, karibu na mahali linapojengwa daraja la Kigamboni, wilaya ya Temeke, jijini Dar es Salaam.Mmoja wa majambazi hao alikamatwa na wananchi na kushambuliwa hadi kufa, huku wenzake watatu wakifanikiwa kutokomea kusiko julikana.

 

Hata hivyo,  sanduku ambalo lilipatikana baada ya kuuawa kwa jambazi huyo, lilikutwa likiwa na Sh. 700 na nyaraka za kikundi hicho na baadhi ya raia katika eneo hilo waliwatuhumu polisi kwamba ndiyo waliochukua fedha hizo kutokana na mazingira tata ya upotevu wa fedha hizo. 

 

Akizungumza na NIPASHE jana, mmoja wa wanachama wa kikundi hicho cha Vicoba chenye wanachama 30, Amanda Mushi, alisema hadi sasa haijulikani aliyechukua fedha hizo kwani jambazi aliyekuwa na sanduku hilo aliuawa na wananchi baada ya kukimbilia kwenye makazi ya watu na wenzake watatu kutokomea kusikojulikana.

 

Kwa mujibu wa Amanda, waendesha bodaboda na  majambazi hao walifukuzana kwa dakika kati ya tano au 10 kabla ya kukamatwa mmoja wao aliyekuwa na mkoba huo na kuuawa na wananchi wenye hasira.

 

“Sanduku limepatikana, halina kitu…limekutwa na Sh. 200 na noti ya Sh. 500 maeneo ya Kigamboni katika kituo cha mafuta mwendo wa dakika tano au kumi kwa pikipiki kutoka eneo la tukio,” alisema Amanda na kuongeza:

 

“Askari alisema walipofika eneo la tukio walilikuta mkoba huo ukiwa linazagaazagaa eneo hilo…wakaamua kulichukua na walipoangalia ndani walikuta halina kitu isipokuwa kiasi hicho cha fedha na nakala.” 

 

Alisema viongozi wa kikundi hicho akiwamo mwenyekiti, katibu na mhazini wametakiwa kuripoti kituo cha polisi kutoa maelezo juu ya tukio hilo la uporaji.

 

Kwa mujibu wa taarifa nyingine ambazo NIPASHE lilizipata, mwenyekiti huo wa kikundi hakupatwa na madhara yoyote zaidi ya kunyang’anywa simu yake wakati majambazi hao walipofika nyumbani kwake na kuingia ndani na kumtaka kutoa fedha na alipogoma walichukua fedha hizo kwa nguvu na kutokomea nazo.

 

Inadaiwa kuwa, mume wa mwenyekiti a huyo hakuwapo wakati tukio hilo linatokea.

 

Hata hivyo mwenyekiti huyo   alipoulizwa, alisema mume wake alikuwa safarini Morogoro, huku taarifa nyingine zikieleza kuwa, mume wake alipotafutwa na kuulizwa alijibu hakuwapo eneo la tukio hivyo hajui chochote kilichotokea.  

 

Juhudi za kumtafuta mwenyekiti huyo  ili aweze kuzungumzia tukio zima lilivyokuwa, hazikuzaa matunda baada ya kupewa taarifa kwamba kwa wakati huo hakuwa na mawasiliano na kwamba alikuwa mbali.

 

Kwa mujibu wa taarifa zilizolifikia gazeti hili kupitia vyanzo tofauti, polisi walionyeshwa sanduku hilo na kwamba aliyelikamata na kulipeleka kituoni alilikuta limeshavunjwa na fedha kuchukuliwa.

 

Akithibitisha kutokea kwa tukio hilo, Kamanda wa Polisi wa Temeke, Kihenya Kihenya, alisema mbali na mauaji hayo, jumla ya Sh. milioni nane ziliporwa na kwamba haijulikani aliyetokomea na fedha hizo.

 

Akifafanua, RPC Kihenya, alisema majambazi hao wakiwa wanne, walifika nyumbani kwa mwenyekiti wa kikundi hicho katika eneo hilo, kimya kimya na kumtaka awape fedha walizodai amepewa ili kuzihifadhi.

 

Kwa mujibu wa RPC Kihenya, mwenyekiti huyo alikataa kwa kuwaambia hana fedha huku akipiga kelele kuomba msaada kwa majirani wakiwamo madereva wa bodaboda waliokuwa karibu na eneo hilo.

 

“Kimsingi kuna tukio limetokea la watu kujaribu kupora Sh. milioni nane mali ya kikundi cha kinamama wa Vicoba eneo la Vijibweni,” alisema kamanda huyo na kuongeza:

 

“Mama mmoja ambaye ni mwenyekiti wao, ndiye anayetunza fedha. Wale jamaa waliingia kimyakimya na kumtaka azitoe hizo pesa. Alipiga kelele kutaka msaada kwa madereva wa bodaboda ambao walifika hapo na kumsaidia,” Alisema na kuongeza:

 

“Wale majambazi wakazichukua zile fedha kimyakimya bila kutumia bunduki na kuanza kukimbia nazo, huku wakifukuzwa na waendesha bodaboda.” 

 

Alisema wakiwa katika purukushani hiyo ya kukimbizana, dereva wa bodaboda na wenzake wawili, walikuwa wakipiga kelele katika barabara waliyokuwa wakifukuzana. 

 

“Baada ya kuona wamelemewa, mmoja wa majambazi hao wanne aliyekuwa amekaa katikati, akachomoa bunduki na kumpiga risasi mguuni dereva wa bodaboda hiyo na kumwacha akianguka na kuvuja damu nyingi.”

 

 “Kelele hizo ziliwaamsha watu wengi na kuanza kuwaandama wahalifu hao ambao baada ya kuzidiwa nguvu, waliamua kukimbia hovyo kwenye makazi ya watu.”

 

Alisema wananchi wenye hasira walifanikiwa kumkamata na kumuua jambazi mmoja, ambaye alikuwa amebeba sanduku lililokuwa na kiasi hicho cha pesa, huku watatu wakifanikiwa kukimbia.

 

Kwa mujibu wa kamanda huyo, baada ya polisi kuwasili katika eneo la tukio, walikuta jambazi huyo ameshafariki na sanduku hilo la fedha lilikutwa likiwa halina kitu mbali na eneo la tukio na kwamba haijulikani aliyezichukua fedha hizo.

 

Alisema dereva huyo wa bodaboda alifariki dunia njiani akikimbizwa hospitali kutokana na kuvuja damu nyingi na kuwaacha wenzake wawili wakiwa wamejeruhiwa.

 

Mwili wa dereva huyo umehifadhiwa katika hospitali iliyopo katika eneo hilo la Vijibweni, huku wa jambazi ukitarajiwa kuhamishwa kutoka hapo kwenda hospitali ya Temeke kwa uchunguzi zaidi.

 

Alisema kwa sasa polisi wanaendelea na upelelezi dhidi ya majambazi waliohusika na tukio hilo kwa ujumla.

 

Kamanda huyo aliwashauri wananchi kuwa na utamaduni wa kuhifadhi fedha zao benki wanapokuwa na kiasi kikubwa cha fedha na pia kuomba msaada wa vyombo vya usalama wanapozipeleka au kuzichukua benki. 

 

CHANZO: NIPASHE