Arejea kutoka mafichoni

Mwanaharakati, Albanie Marcossy ambaye amekimbia makazi yake na kwenda mafichoni akidai anaogopa vitisho kutoka kwa watu wasiojulikana. 

Na Aisha Ngoma, Mwananchi.

Posted  Ijumaa,Marchi22  2013.

KWA UFUPI

“Tumeona matukio ya kutekwa, kuteswa na kuuawa  kwa waandishi wa habari pamoja na wanaharakati ni mwendelezo  wa kubinywa uhuru wa vyombo vya habari.

Marcossy Albane.

Dar es Salaam. Mwanaharakati ambaye pia ni Mkurugenzi wa Civil and Political Rights Watch, Marcossy Albanie ameeleza jinsi alivyotoweka jijini  Dar es Salaam baada ya kuwa akifuatiliwa mara tano  na watu wasiyojulikana.

Akizungumza na gazeti hili jana, alisema mwaka uliopita  alikuwa akifuatiliwa na watu ambao hakujua nia yao.

“Niliwahi kufuatiliwa  na gari kutoka  Kimara Korogwe hadi Kinondoni Mbuyuni kilipo kituo cha matangazo cha Startv  na watu ambao sikuwafahamu, nilipofika ndani ya jengo hilo gari hiyo iligeuza na kurudi ilipotokea “alisema Albanie.

Alisema kilichomtisha zaidi ni kitendo cha siku ya mwisho kabla ya yeye kuamua kutoweka.
Alisema katika siku hiyo, watu watatu walitumia  usiku mzima  wakizunguka nyumbani kwake.
Alisema kwa sasa amerudi jijini kwa kuwa ameshatoa taarifa polisi juu ya mambo ambayo yanamfanya akose amani ya kufanya kazi zake.

Albane alisema kwa kipindi hiki amekuwa akitumia muda mwingi kukaa na wafanyakazi wenzake na kuogopa kukaa peke yake kwa kuhofia usalama wake.

Albanie alisema  usalama wa waandishi wa habari na wanaharakati  unatakiwa kuimarishwa. Alisema mambo yanayoendelea hivi sasa kwa wanahabari  ni katika kudhibiti uhuru wa habari nchini hapa
.