Maalim Seif aapa kufa na mafisadi Zanzibar.

Mgombea Urais wa Zanzibar kwa tiketi ya Chama cha Wananchi (Cuf), Maalim Seif Sharif Hamad.

Mgombea Urais wa Zanzibar kwa tiketi ya Chama cha Wananchi (Cuf), Maalim Seif Sharif Hamad, amesema akichaguliwa kuwa Rais wa visiwa hivyo, serikali yake itapambana vikali na rushwa, ufisadi na matumizi mabaya ya rasilimali za nchi bila ya kujali cheo au ukaribu wa mtu kwa serikali.

Maalim Seif alitoa kauli hiyo jana wakati wa mkutano wake wa kampeni za urais na kunadi sera za chama hicho katika viwanja vya Tibirinzi, Chake Chake, Pemba.

Aidha, alisema akichaguliwa ataunda utawala  unaojali uhuru wa nchi, haki za kila Mzanzibari na maridhiano ya Wazanzibari.

Alisema vitendo vya rushwa na ufisadi vinadidimiza uchumi na maendeleo ya wananchi na kwamba hatokubali kuona vitendo hivyo vinaendelea na ataimarisha maslahi ya wafanyakazi wa serikali pamoja na kuwalipa stahiki zao.

Maalim Seif ambaye pia ni Makamu wa Kwanza wa Rais wa Zanzibar, aliongeza kuwa lengo la serikali yake ni kuwaunganisha Wazanzibari na kuwapatia haki zao bila ubaguzi wa aina yoyote ili wajisikie kuwa uhuru ndani ya nchi yao.

CHANZO: NIPASHE