CUF chatangaza kutomtambua Meya Tanga

Chama cha Wananchi CUF Wilaya ya Tanga kimetangaza  rasmi msimamo wake wa kutomtambua Meya wa Jiji la Tanga, Mhina Mustaph maarufu kwa jina la Seleboss na kwamba hakitaruhusu madiwani wa Chama hicho na wa umoja wa Katiba ya Wananchi UKAWA kwa ujumla kushiriki vikao atakavyoviitisha.

Aidha umoja huo wa katiba ya wananchi UKAWA umepanga kuwasilisha malalamiko yao kwa Waziri  ofisi ya Rais Tawala za Mikoa na Serikali za Mitaa (TAMISEMI) kumtaka  kumuajibisha Mkurugenzi wa halmashauri ya Jiji la Tanga, Daud Mayeji  kwa kuvuruga uchaguzi wa umeya na kuitia hasara serikali.

Akizungumza na NIPASHE, Mwenyekiti wa CUF Wilaya ya Tanga, Rashid Jumbe alieleza kuwa msimamo wa  vyama vinavyounda umoja wa katiba ya wananchi UKAWA  wa kutomtambua Seleboss upo palepale mpaka uchaguzi
huo utakaporudiwa ama kutangazwa mshindi halali wa nafasi hiyo.
Jumbe  ambaye alikuwa akizungumzia  kuvurugika kwa uchaguzi wa meya wa Jiji la Tanga uliofanyika Desemba 19 mwaka jana, alisema  serikali kupitia Tamisemi  ni vema ikatoa tamko la nini kifanyike kuhusiana na matokeo  hayo ya udanganyifu ambayo yalimpa ushindi mgombea umeya wa
Chama cha Mapinduzi CCM.

“Tunamtaka Waziri mwenye dhamana  kumuajibisha Mkurugenzi wa Jiji la Tanga kwa kufanya  udanganyifu  wa kumtangaza mgombea wa CCM  huku akijua siyo mshindi halali wa uchaguzi huo…..vinginevyo  hakutakuwa na
vikao vya baraza mpaka kieleweke” alisema Jumbe.

Alieleza kuwa  wanachohitaji  ni haki kwa kuwa  madiwani wa umoja wa katiba ya wananchi hawamtambui  Mhina  kama meya kwani ushindi wake umegubikwa na hila na dhuruma  na kwamba  kwa matokeo hayo halmashauri haitafanya vikao  vyovyote  kutokana na CCM kutotimia  akidi ya
wajumbe.

Alieleza  kuwa  baraza la madiwani la halmashauri hiyo  CCM  ina madiwani 17  ambao ni wajumbe halali na umoja wa katiba ya wananchi UKAWA inamadiwani 20 na kwamba kwa matokeo hayo  CCM  hawawezi kuendesha baraza   na kuunda kamati.

Alisema kutokana na hali hiyo wanaiomba serikali kuhakikisha uchaguzi wa Umeya Jiji la Tanga unarudiwa ili kuwatendea haki wananchi wanaosubiri miradi mbalimbali ianze kutekelezwa kutokana na kuwepo kwa vikao vya mabaraza ya madiwani na uundwaji wa kamati ambazo mpaka sasa
hakuna kamati hata moja iliyokwisha undwa.

SOURCE: NIPASHE JUMAPILI