Mzee Sumaye anaendelea vizuri, Mbowe amtumia salaam!

Mjumbe wa Kamati Kuu ya Chama cha Demokrasia na Maendeleo (CHADEMA) na Waziri Mkuu Mstaafu, Mzee Frederick Sumaye anaendelea vizuri na matibabu chini ya uangalizi wa madaktari wa Jakaya Kikwete Cardiac Institute (JKCI) alikohamishiwa Jana Usiku baada ya kupokelewa Hospitali ya Taifa Muhimbili akitokea Hospitali ya Mkoa wa Tanga jioni ya jana.

Mwenyekiti wa Chama hicho Taifa, Mhe. Freeman Mbowe ambaye bado yuko mahabusu Gereza la Segerea pamoja na Mbunge Esther Matiko, amemtumia salaam za pole na kumtakia uponaji wa haraka Mzee Sumaye ili arejee katika majukumu yake.

Aidha, Katibu Mkuu wa Chama, Dkt. Vincent Mashinji, Mjumbe wa Kamati Kuu na Waziri Mkuu Mstaafu Edward Lowassa, Mwenyekiti wa Baraza la Vijana wa CHADEMA Patrick Ole Sosopi pamoja na viongozi wengine wa Chama hicho ngazi na maeneo mbalimbali ya nchi, wamefika hospitalini hapo kumjulia hali na kumpatia pole Mzee Sumaye ambaye pia Mwenyekiti wa Chama Kanda ya Pwani.