Bibi aliyekatwa viungo azikwa, polisi wavisaka!

Watu watatu wanashikiliwa na Jeshi la Polisi mkoani Kagera kwa tuhuma za kumuuwa Mama yao mzazi Frazia Rukera (99), mkazi wa Kijiji cha Mkombozi kata ya Rukuraijo wilayani Kyerwa kwa kumkata kichwa, miguu na mikono.

Kaimu Kamanda wa Polisi mkoani Kagera Tuntufye Mwakagamba, amesema kuwa tukio hilo lilitokea Julai 07 mwaka huu, majira ya saa 10:00 alfajiri wakati Bibi huyo akiwa amelala ndani peke yake, na kwamba baadhi ya viungo vilivyokatwa kutoka katika mwili wa Bibi huyo ambavyo ni kichwa, mguu mmoja na mkono mmoja havijapatikana.

Aidha, Kamanda Mwakagamba, amesema kuwa bibi huyo tayari amekwishazikwa bila kuwa na baadhi ya viungo vyake ambavyo vinaendelea kusakwa na polisi.

Amewataja watuhumiwa wanaoshikiliwa kuwa ni Laurent Francis (60), Alexanderea Francis (55) ambao ni watoto wa bibi aliyeuawa na Agnes Gidion (70) ambaye ni mkwe wa marehemu, na wote ni wakazi wa Kijiji Nyabikurungo kilichoko wilayani humo.