AJIBIWA MSHAIRI KUTOKA OMAN ANAETAKA KUENDA UNGUJA KUOWA!

Nami nakwenda Unguja, kumtafuta wa haja

Sisikizi zenu hoja, nakwenda moja kwa moja

Naikidhi yangu haja, siambiwe nimeroja.

 

Taanza pale Baghani, nimtafute mwandani

Si yule wa majiani, aletwe kutoka ndani

Anipendeze machoni, na hata mwangu moyoni

Nakwenda owa Unguja, nimpate wa faraja 

 

Tasogea na Shangani,  nikachungulie ndani

Nimwage ya kifuani, bila kujifanya duni

Wenyeji kuniamini, niwekwe mwao vichwani

Nakwenda owa Unguja, nimpate wa faraja 

 

Tapita Vikokotoni, hodi yangu mpaka ndani

Taomba kina fulani, yule kiumbe wa shani

Niletewe ukumbini, irudi nuru machoni

Nakwenda owa Unguja, nimpate wa faraja 

 

Nipelekwe Kinyasini, nisisahau  Chuwini

Nipite pia Bumbwini, nitange na Mangapwani

Na uwanda wa Chaani, khitamu Mkokotoni

Nakwenda owa Unguja, nimpate wa faraja 

 

Mnichukuwe na Mwera, nituwe pale Uroa

Niwasalimu Makoba, niwasilishe haiba

Yu wapi asio miba, simtaki wa kuiba

Nakwenda owa Unguja, nimpate wa faraja 

 

Kimwana alie fana, natafuta kumuona

Kwa tabia ilo njema, ya urefu na mapana

Huyu wangu toka jana, ndotoni nikimuona

Nakwenda owa Unguja, nimpate wa faraja

By an Unknown author, Oct 2021 Muscat, Oman.

MAJIBU: Wa-Unguja wamejaa, hapo hapo unapokaa.

Wewe mtu wa viroja, kazi yako kuporoja,

Wa-Unguja wamejaa, hapo hapo napokaa,

Tafuta wako wasaa, siku inayokufaa

Sianze pale Baghani, wala siende Shanghani,

Wari wazuwiwa ndani, kuwaogopa wageni,

Huko kwenu wao duni, hata upo safarini?

Wa-Unguja wamejaa, hapo hapo napokaa.

Na wengine kama wewe, walifika Visiwani,

Tukiwapigia yowe, kote mwetu mitaani,

Mwenzangu ujielewe, si Unguja ya zamani,

Wa-Unguja wamejaa, hapo hapo napokaa.

Labda tafuta bubu, au asiesikia,

Atadhani wa Bububu, huyo atashangiria,

Msomi usijaribu, ajua ya Omania,

Wa-Unguja wamejaa, hapo hapo napokaa.

Usiende Kinyasini, wala kule Mangapwani,

Bora uende Bumbwini, upambane uchawini,

Kama wafuga majini, huko tapata mwandani,

Wa-Unguja wamejaa, hapo hapo napokaa.

Kimwana aliefana, tafuta utamuona,

Kama hujapata jana, endelea kutizama,

Ndotoni naemuona, huyo sie wa maana,

Wa-Unguja wamejaa, hapo hapo napokaa.

Kwani wataka ongeza, kutimiza yako sunna?

Kwa hilo nakupongeza, nenda hata kule China

Siwezi tena kubeza, Unguja tutaonana

Wa-Unguja wamejaa, hapo hapo napokaa.

Njoo ujichagulie, tupate changanya damu,

Mola akukubalie, umuache wa haramu,

Ili uje utulie, uwe kama mwanadamu,

Wa-Unguja wamejaa, hapo hapo napokaa.

/By An Unknown Author, Zanzibar!