SHAIRI: FATUMA AJAJUU BAADA YA MUMEWE KUREJEA MUSCAT!

MIMI SIJAWAANGUSHA , 

NYINYI NDIO FATAANI!

Jina langu ni Fatuma, mtoto wa bwana Faki,
Mume wangu kanihama, sababu ya unafiki,
Kaenda kwao Haima, harusi tena hataki,

Mimi sijawaangusha, nyinyi ndio fataani.

Kichwani upo uchungu, tumbo linanibiruka,
Namshitakia Mungu, kwa haya yalonifika,

Kama nilokula kungu, nipo nimesawajika,

Mimi sijawaangusha, nyinyi ndio fataani.

Rafiki kia la fisi, maneno nayawafiki,
Ataka kunifilisi, kuniny'ang'anya riziki,
Hakuna atachorisi, kwani yeye hausiki,

Mimi sijawaangusha, nyinyi ndio fataani.

Eti atoa sababu, kama nilihujumiwa,
Habibu wala Shaibu, sio wakutuhumiwa,
Mimi kwao arbabu, ni kama mheshimiwa,

Mimi sijawaangusha, nyinyi ndio fataani.

Habibu mtu mzuri, nyumbani anafagia,
Shaibu yeye hodari, jikoni atupikia,
Bora aje Daktari, kuliko kuwasingizia,

Mimi sijawaangusha, nyinyi ndio fataani.

Asema haikujibu, yeye aliiandikia?

Alitaka na jawabu, kwa huduma ya kuria?
Amshawishi na babu, mimi kuniharibia,

Mimi sijawaangusha, nyinyi ndio fataani.

Amshawishi na babu, mimi kuniharibia,
Huyu kakosa adabu, tena ni mzandikia,

Kwa kweli nastajabu, hii ya leo dunia,

Mimi sijawaangusha, nyinyi ndio fataani.

Wameona nishapata, Omani nitahamia,
Wakapiga parapata, nipate kuangamia,

Mwengine nitampata, kwa nguvu zake Rabbia,

Mimi sijawaangusha, nyinyi ndio fataani.

Azuwiwa mlangoni, asipate kuingia,

Akaambiwa usoni, hakuna chakufatia,

Harusi haipo ndani, wengine washajilia,

Mimi sijawaangusha, nyinyi ndio fataani.

Harusi haipo ndani, wengine washajilia,

Huu ni ufataani, sina nilompatia,

Hawa watu mashetani, kwanini wanizulia?

Mimi sijawaangusha, nyinyi ndio fataani.

Akatoka kwa hamaki, gari kajichukulia,

Mpaka Kiembe Samaki, na ndege akarukia,

Nimekosa yangu haki, kuanzisha familia,

Mimi sijawaangusha, nyinyi ndio fataani.

Sio wa kuaminiwa, huyu eti ni rafiki,

Jina hataki kutowa, ajijua mnafiki,

Mola atampopowa, kwani anastahiki,

Mimi sijawaangusha, nyinyi ndio fataani.

Kwaheri naenda Tanga, kidogo kupumzika,

Si rafiki si mshenga, roho zao za birika,
Rabbana atawatwanga, wazidi kufisidika,

Mimi sijawaangusha, nyinyi ndio fataani.

Fatuma Faki/Zanzibar, October 31, 2021.

https://zanzibarnikwetu.blogspot.com/2021/10/shairi-fatuma-katuangusha-katuvunjia.html#more