- Siri kufichuliwa Ijumaa
Gazeti hili linafahamu pia kwamba mshindi wa Uchaguzi Mkuu wa Marudio uliofanyika Machi 20 mwaka huu, Dk. Ali Mohamed Shein, ana mpango wa kuunda Serikali ya Umoja wa Kitaifa (SUK) kutoka miongoni mwa vyama 13 vilivyoshiriki katika uchaguzi huo uliosusiwa na Chama cha Wananchi (CUF) pamoja na vyama vingine saba.
Kuna uwezekano mkubwa kwamba mrithi wa Hamad akawa ni mwanasiasa kutoka chama cha upinzani (si CUF), endapo atafanikisha mojawapo ya masharti ya kikatiba.
Vyanzo vya kuaminika vya gazeti hili vilivyo karibu na SMZ na Ikulu ya Zanzibar vimeeleza kwamba Dk. Shein hafikirii kuunda serikali ya Chama Cha Mapinduzi (CCM) pekee bali atashirikisha upinzani.“ Walio karibu na waliozungumza na Dk. Shein kabla na baada ya Uchaguzi wa Marudio wanasema ni kwamba anataka kuendelea na SUK. Hapendelei kuunda serikali ya chama kimoja hata kama amepata ushindi wa kishindo. Tusubiri tuone. Nadhani tutajua kabla wiki hii haijaisha,” alisema mmoja wa mawaziri wa SMZ katika serikali iliyopita ya Shein katika mazungumzo yake na gazeti hili yaliyofanyika juzi Jumatatu.
Dk. Shein alitangazwa na Mwenyekiti wa Tume ya Uchaguzi ya Zanzibar (ZEC), Jecha Salim Jecha, kuwa mshindi katika uchaguzi huo kwa kupata asilimia 91.4 ya kura zote zilizopigwa.
Chama kilichofuatia kwa kupata kura nyingi kilikuwa ni chama cha Alliance for Democratic Change (ADC) ambacho mgombea wake wa urais, Hamad Rashid Mohamed, alipata asilimia 3.0 ya kura zote zilizopigwa.
Kutokana na matokeo hayo, hakuna chama cha upinzani kilichopata asilimia 10 ya kura ambazo zingetosha kuunda SUK na CCM na pia hakuna chama kilichopata walau kiti kimoja katika Baraza la Wawakilishi na kushika nafasi ya pili kama Katiba ya Zanzibar inavyotaka.
Katiba ya Zanzibar Ibara ya 39 inatamka; “(1). Kutakuwa na Makamo wawili wa Rais ambao watajulikana kama Makamo wa Kwanza wa Rais na Makamo wa Pili wa Rais.
“(3) Makamo wa Kwanza wa Rais atatakiwa awe na sifa za kumuwezesha kuchaguliwa kuwa Mjumbe wa Baraza la Wawakilishi na atateuliwa na Rais baada ya kushauriana na chama kilichotokea nafasi ya pili katika matokeo ya kura ya uchaguzi wa Rais, isipokuwa kwamba:-
“(i) Iwapo chama kilichotokea nafasi ya pili katika matokeo ya kura ya uchaguzi wa Rais kimepata chini ya asilimia kumi (10%) ya kura zote za uchaguzi wa Rais, au
(ii) Endapo Rais atakuwa hana mpinzani, basi nafasi ya Makamo wa Kwanza wa Rais itapewa chama chochote cha upinzani kilichotokea cha pili kwa wingi wa viti vya majimbo katika Baraza la Wawakilishi.
Mara baada ya kutangazwa kwa matokeo hayo, watu mbalimbali walitoa maoni yao kupitia mitandao mbalimbali ya kijamii.
Mwanasheria wa Chama cha Demokrasia na Maendeleo (Chadema), John Mallya, alieleza kwamba kwa matokeo hayo, SUK imekufa rasmi kwa sababu hakuna chama cha upinzani kilichopata asilimia kumi wala wawakilishi.
Kwa upande wake, Naibu Katibu Mkuu wa zamani wa CUF, Julius Mtatiro, alisema kwa namna hali ilivyo sasa, itabidi CCM itafute Makamu wa Kwanza wa Rais kutoka katika chama kilichopata wawakilishi wengi.
“My take (mtazamo wangu); Kwa sababu hakuna chama kilichofikisha asilimia 10 ya kura za urais, M1R (Makamu wa Kwanza wa Rais) atatoka kwenye chama kisicho CCM lakini chenye wajumbe wa baraza la wawakilishi kwa kuifuatia CCM,” alisema.
Kwa kufuata msitari wa maoni ya Mtatiro, kuna namna moja ambayo Dk. Shein anaweza kufanya ili kupata mtu anayefaa kuwa M1R – kuteua wajumbe wa Baraza la Wawakilishi kutoka katika mojawapo ya vyama vilivyoshiriki katika uchaguzi huo.
Katiba ya Zanzibar inampa Rais nafasi ya kuteua wajumbe 10 wa Baraza la Wawakilishi na kama Dk. Shein ataona inafaa anaweza kuchagua wawakilishi hao kutoka miongoni mwa vyama hivyo na kile kitakachokuwa na idadi kubwa ya wawakilishi kinaweza kutoa Makamu wa Kwanza wa Rais wa SMZ.
Kama Dk. Shein atafanya hivyo, kuna uwezekano mkubwa wa nafasi hiyo kuangukia kwa Hamad Rashid Mohamed ambaye ni Mbunge wa zamani wa Jimbo la Wawi (Pemba) kupitia CUF.
Wakati akizungumza mara baada ya kutangazwa mshindi, Dk. Shein alimpongeza Hamad kwa hotuba yake nzuri na kwa kushiriki kwake katika uchaguzi huo; na kwa kuwa ndiye mgombea aliyepata kura nyingi baada ya mshindi, ana uwezekano mkubwa wa kutwaa nafasi hiyo.
Habari ambazo gazeti hili ilizipata wakati tukienda mitamboni zilieleza kwamba Dk. Shein ataapishwa kuwa Rais wa Zanzibar kesho Alhamisi na Katiba ya Zanzibar inamtaka awe amemtangaza Makamu wa Kwanza wa Rais katika kipindi cha siku saba tangu kuapishwa.
Nafasi ya Makamu wa Pili wa SMZ inatarajiwa kuendelea kushikiliwa na Balozi Seif Ali Iddi, ambaye anatajwa kufanya kazi kubwa ya kisiasa kwenye uchaguzi huu.
Wakati Katiba ya Zanzibar inamtaka Makamu wa Kwanza wa Rais asiwe Mjumbe wa Baraza la Wawakilishi, inamtaka Makamu wa Pili awe mjumbe katika baraza hilo.
Balozi Iddi aliyewahi kuwa Naibu Waziri wa Mambo ya Nje na Ushirikiano wa Kimataifa ameshinda nafasi ya Mjumbe wa Baraza la Wawakilishi katika Jimbo la Kitope, Unguja.
Taarifa kutoka Ikulu zinaeleza kuwa kuna uwezekano mkubwa wa Dk. Shein kumtangaza M1R mwishoni mwa wiki hii kwa sababu anataka Baraza la Wawakilishi likutane mapema iwezekanavyo.
“ Kwenye hii miezi minne bila ya Baraza la Wawakilishi mambo mengi yamekwama. Na sasa tunataka kujiandaa kwa ajili ya bajeti ya mwaka ujao wa fedha na hatuwezi kufanya kitu bila baraza. Kila kitu Rais mteule atakimaliza wikiendi hii,” kilisema chanzo cha gazeti hili.
Matokeo ya uchaguzi huu yanaweka katika hali ya sintofahamu mustakabali wa kisiasa wa Seif Shariff Hamad pamoja na CUF ambao tangu kuanza kwa siasa za vyama vingi ndiyo walikuwa washindani wakuu wa CCM.
Maalim Seif alitangaza kuususia uchaguzi huo wa marudio na chama hicho hakikusimamisha mgombea yeyote hata mmoja.
No comments :
Post a Comment