Mbunge: Wanafunzi Zanzibar wapewe upendeleo.

Written by Ghalib  //  25/04/2013 

ALHAMISI, APRILI 25, 2013 07:22 NA DEBORA SANJA, DODOMA

WIZARA ya Elimu na Mafunzo ya Ufundi imesema kukosekana kwa wanafunzi kutoka Zanzibar wanaopata ufadhili wa kusoma nje ya nchi kunatokana na kutokukidhi vigezo vinavyohitajika.

Taarifa hiyo ilitolewa bungeni jana na Waziri wa Elimu na Mafunzo ya Ufundi, Dk Shukuru Kawambwa, wakati akijibu swali la Mbunge wa Gando, Khalifa Suleiman Khalifa (CUF).

Katika swali lake alitaka kuwepo na mgawanyo wa nafasi kutoka Zanzibar za wanafunzi wanaopata ufadhili wa kusoma nje ya nchi badala ya kufuata vigezo ili kuepuka wanafunzo kutoka Zanzibar kukosa nafasi.

Dk Kawambwa alisema hakuna utaratibu wa kutenga nafasi maalum kutoka Zanzibar kwa nafasi za ufadhili, bali nafasi hizo hutengwa katika sekta nyingine kama vile ajira.

Katika kuchagua wanafunzi wanaoomba ufadhili kamati huchukua wajumbe kutoka bara na visiwani ambayo huamua nani apate ufadhili na kutokana na vigezo hivyo, wakati mwingine wote walioomba wanaweza wakakosa,” alisema Dk Kawambwa.

Awali akijibu swali la msingi la Arfi, Naibu Waziri wa Elimu na Mafunzo ya Ufundi, Philipo Mulugo, alisema nafasi zinazotolewa za kusoma nje ni kwa ajili ya wananchi wa Jamhuri ya Muungano wa Tanzania.

Alisema wananchi wote wanaoomba wanashindanishwa kwa vigezo vya kitaaluma na si vinginevyo.

“Katika kipindi cha mwaka 2010 hadi 2012 nchi ambazo zimekuwa zikitupatia nafasi za masomo nje ya nchi ni Cuba, Algeria, Urusi, Msumbiji, Serbia, Uingereza, Misri, Korea ya Kusini, Macedonia, Uturuki, China, Ujerumani na Oman,” alisema.

Katika swali lake la msingi, Arfi alitaka kujua vijana waliopata ufadhili wa kusoma nje katika kipindi cha mwaka 2010 hadi 2012 na nchi walizokwenda.

Jamii forum