CUF: Bajeti ya 2013/14 haikidhi haja ya maendeleo

NA MUHIBU SAID

17th June 2013

Mwenyekiti wa CUF, Profesa Ibrahim Lipumba

Chama cha Wananchi (CUF) kimeikosoa Bajeti ya Serikali ya mwaka 2013/14 iliyowasilishwa bungeni, Alhamisi wiki iliyopita, na Waziri wa Fedha, Dk. William Mgimwa, kikisema haikidhi haja ya maendeleo ya Taifa, hivyo haiwasaidii Watanzania.

Mwenyekiti wa CUF, Profesa Ibrahim Lipumba, alisema serikali haipo makini kwa sababu bajeti inaonyesha dhahiri inategemea misaada na mikopo ya nje ya nchi.

Profesa Lipumba alisema bajeti ya mwaka huu imeshindwa kuainisha wazi fedha zilizokuwa zinaongezwa kwenye baadhi ya wizara zinakotoka , huku kukiwa hakuna sehemu iliyopunguzwa fedha zilizopendekezwa na Bunge.

“Fedha zilizoongezwa kwa wizara zote ni Sh. bilioni 500 sawa na asilimia tatu. Swali ni kwamba, zinatoka wapi? Na istoshe tatizo kubwa tulilonalo katika taifa ni hili ni usimamizi mbovu wa miradi na kufanyiwa uchambuzi,” alisema Profesa Lipumba.

Alisema kitendo cha Bunge kujadili na kupitisha bajeti ya kila wizara hakikuwa kizuri kwa sababu wabunge hawakujua fedha wanazozipitisha zinakotoka.

“Sasa tunashuhudia mapato ya ndani ni Sh. trilioni 11.5, lakini matumizi ya kawaida ni  Sh. trilioni 12. 6, ambayo ni makubwa kuliko matumizi ya ndani. Hii inamaanisha bajeti ya maendeleo inategemea misaada,” alisema Profesa Lipumba.

Profesa Lipumba alisema pia kuna miradi, ambayo imekuwa ikitajwa kwenye hotuba ya bajeti kila mwaka, lakini haitekelezwi.

Alisema bajeti ya mwaka huu, haikuwa na uchambuzi yakinifu juu ya bomba la gesi la Mtwara.
Alisema kitendo hicho kimemfanya aende kwa wahisani wa Benki ya Dunia (WB) kuwataka kama wana uchambuzi huo, nao wakasema nao waliomba, lakini hawapewi.

“Zaidi ya asilimia 30 ya bajeti hii inategemea misaada na mikopo ya nje, hii ni hatari kubwa na kielelezo cha serikali isiyo na macho na mawazo ya kufikiri mbele. Tumeshuhudia imetoa misamaha ya kodi zaidi ya asilimia nne,” alisema Profesa Lipumba.

Alisema inashangaza kusikia waziri akisema Deni la Taifa limefikia asilimia 23, hivyo Taifa linakopesheka, wakati si kweli.

Profesa Lipumba alisema kiukweli Deni la Taifa limefikia Sh. trilioni 23 sawa ana asilimia 50 na kusema: “Hii ni hatari! Tunaelekea kufikia mwisho.”

Alisema bajeti hiyo pia haijaonyesha sekta ya madini inakusanya kiasi gani na kusema hakubaliani na kitendo cha waziri kusema serikali itafanya uchambuzi.

Alisema bajeti ya mwaka huu haikuonyeha utekelezaji wa ajira 70,000 zilizoanishwa katika bajeti ya 2012/13 na badala yake imetaja kwa kimafungu bila ufafanuzi.

Alisema bajeti hiyo ilishindwa kuainisha  gharama za kukopa madeni ya nje na yale, ambayo serikali imeshindwa kuyalipa kwa muda mrefu, huku mzigo huo ukielekezwa  kwa Watanzania kulipa.

Profesa Lipumba alisema haiwezekani mtumishi anayelipwa mshahara wa Sh. 500,000 kutozwa kodi ya Sh. 62,000 na kuongeza kuwa huo ni ukandamizaji mkubwa.

CHANZO: NIPASHE