ZANZIBAR KUOMBA 4.5% KUTOKA EU NA KUTOKA SERIKALI YA MAREKANI (MCC)!

Mr President - hii kuumwa na kichwa umejitakia mwenyewe 

kwa kujizungusha na wezi wasioitakia jema nchi yetu! 

(Zanzibar) – Inasemekana kuwa baadhi ya Wazanzibari hivi karibuni watakutana na Balozi wa Finland katika Tanzania Bibi Sinikka Antila ambae ni Mwenyekiti wa EU Budget Support Development Partners (DP) pamoja na Balozi wa Marekani katika Tanzania Bwana Mark Childress. 

Mkutano huo utakuwa na nia ya  kuiomba EU pamoja na Serikali ya Marekani chini ya mpango wake wa Millennium Challenge Corporation (MCC) ili Zanzibar ipatiwe sehemu yake ya 4.5% ya pesa ambazo Serikali ya Muungano itazikosa, kama Rais wa Jamhuri ya Tanzania atashindwa kuchukuwa hatua madhubuti na kali ambazo zitawafanya wahisani wa EU na Serikali ya Marekani kubadilisha misimamo yao juu ya hii kasheshe ya wizi kutoka katika Akaunti ya Escrow ya Tegeta.

Wazanzibari hao ambao hawajulikani ni wachama gani wanasema hizi ni pesa nyingi sana kuzikosa na kama Serikali ya Muungano haitojali kwa kukosa kutoa adhabu kali kwa hawa wezi ili wahisani wabadilishe mawazo yao, basi Zanzibar iombe kwa wahisani sehemu yake ya 4.5% ambayo ingepata kutoka kwa Serikali ya Muungano kama wizi wa Escrow usingelikuwepo, kwaajili ya maendeleo ya Zanzibar.

Ambassador Sinikka Antila of the Embassy of Finland in Tanzania with Hon. Bernard K. Membe (MP), Minister for Foreign Affairs and International Co-operation in 2012 in his office in Dar es Salaam.   

MCC peke yake ilipanga kuipa Tanzania baina ya $450-700 millions na EU $489 millions baada ya kuisha kutanguliza kutoa $69 millions mapema mwaka huu. Inafahamika kuwa katika miaka 5 iliyopita Tanzania ilitegemea sana juu ya $698 millions iliyopokea kupitia huu mpango wa MCC kwaajili ya miradi yake ya kusambaza umeme na maji safi nchini. Zikikosekana pesa hizi za MCC kasi ya miradi hii ambayo  inawasaidia sana wananchi wengi hasa wa vijijini itapungua.

“ Kwa kweli tunahakika kuwa wahisani hawatorejea nyuma, kwasababu hatua atakazozichukuwa Rais wetu tayari zinajulikana, nazo ni: Kwanza, atawataka wote waliopewa pesa kiholela kutoka Akaunti ya Escrow wazirejeshe kwa muda wa mwezi mmoja. Pili, atawatoa Serikalini wale wote waliohusika na wizi huu, kama mapendekezo ya Bunge yalivyotaka, lakini, Rais hatopendekeza kuchukuliwa kwa hatua za kisheria kwa hawa wezi right away, isipokuwa Rais atatamka kuwa uchunguzi unaendelea na kama pakionekana kuwa sheria za nchi zilivunjwa basi wahusika watapelekwa mahakamni. Hapo ndipo itakapomalizikia kesi hii na hakuna hatua zozote za kisheria zitakazochukuliwa huko mbele”, alielezea msomi mmoja ambae anafuatilia hii habari ya Akaunti ya Escrow kwa karibu sana.

 “Kama wezi hawatochukuliwa hatua za kisheria right away wahisani hawatoridhika, kwani watadhania kuwa kuna mikono mingi iliohusika na wizi huu na ambayo inafichwa,” aliendelea.

“ Kwa upande mwengine, kama hatua za kisheria zitachukuliwa na Rais, basi huenda zikafichua mambo ambayo itaifanya Serikali ya Muungano kutikisika na CCM kubwagwa chini na kwahivyo hatua kama hizo Rais hatozichukuwa ”, aliendelea mzungumzaji huyo.

Walipoulizwa baadhi ya wachunguzi wa siasa wa mjini DSM kuhusu uwezekano wa Zanzibar kuomba 4.5% yao kutokana na msaada wa EU na MCC, wengi walisema kuwa hio ni haki yao Wazanzibari. “ Misaada yote inayokuja kwa jina la Serikali ya Muungano, Zanzibar inayo 4.5%, japokuwa wakati mwengine hatuwapi kitu. Lao kubwa Zanzibar ni kuifahamisha EU na Serikali ya Marekani kuwa wao hawamo katika wizi uliotokea na kuwa hakuna Mzanzibari hata mmoja – kuanzia wanasiasa, mawaziri, majaji au mapadri Wa Zanzibar ambao walihusika na wizi huu na kwahivyo wasitiwe Wazanzibari adabu ya kunyimwa hii misaada”, alielezea mchunguzi mmoja wa siasa ambae hakutaka jina lake litajwe.

Akaendelea kusema kuwa, “ Sio haki kuwa kuiba aibe Kaka na adabu atiwe Kaka pamoja na mdogo wake, wakati mdogo wake wala hakuhusika na huo wizi. Kwahivyo, kama Rais atashindwa kuonesha kuwa  havumilii magendo, rushwa na wizi wa aina yoyote ile nchini, basi Zanzibar itakuwa na haki ya kuiomba EU na MCC ili ipatiwe 4.5% ya misaada hio kama mambo yatakuenda kombo kama wengi tunavyodhania kutokana na historia ya vita vyetu dhidi ya rushwa nchini”, alimalizia huyu gwiji wa siasa.

Kwa vyovyote vile, bado ni mapema sana kusema chochote kwa sasa. La kuomba ni kuwa Rais wetu atatoa adhabu kali kwa wezi wote, kama vile kufungwa maisha na kuporwa mali zao zote - adhabu ambayo itakuwa fundisho kwa wezi wengine. Hatuombi kuwa uroho wa wakubwa fulani wa kutaka kujilimbikizia mapesa kwa mabilioni kwa haraka haraka kutatukosesha maendeleo yetu wananchi wa kawaida katika nchi hii.