SHAIRI: BAADA YA KUACHWA KWENYE MATAA, FATUMA BINTI FAKI SASA APOSWA NA MKOJANI!

FATUMA BINTI FAKI, POSA NINAKULETEA!

HODI ni mimi Faruki, salam zangu pokea,
Bibie sikudhihaki, pole kwa yalotokea,
Kama yule hakutaki, mimi ninakupokea,

Fatuma binti Faki, posa ninakuletea.

Nilikupenda zamani, ni khofu kukuambia,

Kaondoka Mu-Omani, sasa mimi naingia, 

Usinitie kapuni, mwenzio nitaumia,

Fatuma binti Faki, posa ninakuletea.

Naomba zako huruma, sije kunikatalia,

Niwe na wewe Fatuma, kuanzisha familia,

Sahau kule Haima, ni bora Tanzania,

Fatuma binti Faki, posa ninakuletea.

Machozi nitakufuta, penzi la kweli kukupa,

Rangi yako ya mafuta, utakacho nitakupa, 

Kwangu mimi hutojuta, kauli chafu sitokupa,

Fatuma binti Faki, posa ninakuletea.

Harusi iwe haraka, juu yako naumia,

Wala usiweke shaka, na ndani sitoingia,

Utalala na kucheka, maisha kufurahia,

Fatuma binti Faki, posa ninakuletea.

Sinahaja na Shaibu, mimi nitakupikia,
Wala na yule Habibu, nyumbani nitafagia,

Ewe wangu mahabubu, nakupenda mia mia, 

Fatuma binti Faki, posa ninakuletea.

Habibu pia Shaibu, waanze kujilimia,
Eka tatu za Bububu, mie nitawagaia,
Kuwa pweke wajaribu, ndio hali ya dunia,

Fatuma binti Faki, posa ninakuletea.

Wala sitokusulubu, bali takuhudumia,

Ila kupuna sharubu, ni kazi ilobakia,

Nyengine sitojaribu, mpenzi kukupatia,

Fatuma binti Faki, posa ninakuletea.

Takulisha mishikaki, pia nyama ya ngamia,

Yule kweli hakutaki, ndio akakukimbia,

Mahari kwa bwana Faki, ndio nayakimbizia,

Fatuma binti Faki, posa ninakuletea.

Najua bwege taitwa, kwayo nitokufanyia,

Wapige kelele kutwa, hao sitowasikia,

Sitoogopa kutetwa, na wala sitochukia,

Fatuma binti Faki, posa ninakuletea.

Sina shamba la mitende, bali ninalo la miwa,

Kuliona bora tuende, utakapojaaliwa, 

Laanza kule Mtende, mpaka mwisho Potowa,

Fatuma binti Faki, posa ninakuletea.

Wakati sasa nadhani, wako wewe kuamua,

Sahau kule Omani, joto litakuripua,

Tuende zetu Kojani, maisha mapya kuzindua,

Fatuma binti Faki, posa ninakuletea.

Faruki bin Juma (Mkono Wa Chuma) / Kojani, November 05, 2021.

https://zanzibarnikwetu.blogspot.com/2021/10/shairi-fatuma-ajajuu-baada-ya-mumewe.html