SHAIRI: BIDADA HITS BACK...... - "FATUMA HEBU JITULIZE"!

Kama Subira unayo, basi mpenzi wa Mungu,

Hukupa uyatakayo, nisikize ndugu yangu,

Utulize wako moyo, hebu punguza machungu,

Kila anaesubiri,Mola husimama nae.


Usiharakishe mambo, yeyote kumvamia,

Ondoa joto la tumbo, twendezetu kwa khatua,

Wala sifate mkumbo, kua nani kaolewa,

Kila anaesubiri, Mola yu pamoja nae.


Nakwambia subiria, subira huvuta kheri,

Mimi na wewe kushea, kwa kweli ni wazo zuri,

Hata kakaangu pia, haitoleta dosari,

Kila anaesubiri, Mola yu pamoja nae.


Khofu ondoa kabisa, mola hajakusahau,

Na wala hajakususa, hawezi kukudharau,

Kakaangu ataposa, shida utazisahau,

Ndugu yangu hujakosa, ni mambo ya dafrau,

Kila anaesubiri, Mola yu pamoja nae.


Nilikwambia uswali, na dua uzizidishe,

Lete istighfali, na swadaka udumishe,

Umlilie Jalali, siku mzima ukeshe,

Kila anaesubiri, Mola yu pamoja nae,


Lakini sasa naona, kibao kimegeuka,

Hata hujaomba sana, wataka kubadilika,

Huko ni kukata kona, ufike unako taka,

Kila mwenye kisubiri Mola yu pamoja nae.


Na mambo mengi mazuri, hua hayana haraka,

Hutangulizwa kwa kheri, kama nilivo tamka,

Fatuma hebu subiri, shindo halina baraka,

Kila mwenye kusubiri, Mola yu pamoja nae.


Na kuhusu kuchangia, sikwamba milionea,

Nimesema nitatoa, huruma ilinijia,

Kwangu jambo la kutoa, napenda kusaidia,

Kila mwenye kusubiri mola yu pamoja nae.


Nami sina njia refu, bora hapa nisimame,

Nishazitaja harufu, zote zenye vina nane,

Maneno matakatifu, nimeyaleta uone,

Na wewe ninakusifu, wajua nini ufanye,

Kila mwenye kusubiri, Mola yu pamoja nae.

Bidada / Toronto, Canada,  November 20, 2021.

https://zanzibarnikwetu.blogspot.com/2021/11/shairi-bidada-aambiwa-na-fatumakama.html?showComment=1637411672879#c2044011119496227052

Support us by considering joining our Patreon scheme at: 

https://www.patreon.com/zanzibarnikwetu