Uamsho - Umefika wakati wa kujitathmini

Sunday, October 21, 2012

Na  A. K Simai

Waingereza walipotaka kuwalemaza wananchi wake wasijihusishe na siasa 

waliandaa mfumo maalum ambao uliwashughulisha wananchi wengi wa 

kawaida na huku wakiwaachia tabaka dogo la mabepari na walio kwenye 

matabaka ya juu (upper class) kushiriki siasa.

Walichokifanya ni kuwajengea mazingira ya kupenda michezo kwa ujumla na 

hasa mpira wa miguu na kuujengea ushindani mkubwa mpaka imekuwa 

ndiyo siasa ya wananchi wa kawaida kuzungumzia mipira kila kona na kila sehemu.  

Homa hii siku hizi ipo hata nyumbani ambapo mtoto mdogo anaweza kukuelezea 

kuhusu ligi ya Uingereza na wachezaji wake kwa upeo mkubwa.

Pia baada ya pirika pirika za kwenda mbio na maisha siku za wikiendi wamewawekea 

sehemu za kujifurahisha kwa vinywaji na miziki ya kila aina ili izidi 

kuwasahaulisha na msongamano wa mawazo wa wiki nzima na hivyo kuwa na 

muda mchache kuzungumzia siasa za nchi.

Naam waingereza walifanikiwa vizuri sana maana sera hii inazidi kuendelezwa 

na huku wanaoshiriki katika maamuzi muhimu na nyeti ya nchi ni kundi la wanasiasa 

wachache wanaotoka katika matabaka maalum.

Wazanzibari walipotaka kuwalemaza wananchi wake waliwajengea maskani na 

mabaraza ya mazungumzo ili wapate muda mwingi wa kuzungumzia siasa na yanayojiri 

huku na kule katika mkondo hatari wa siasa.

Wanasiasa wakaichukua siasa na kuitoa pahala pake inapopaswa iwepo wakaipeleka 

sehemu isiyopaswa kuwepo na kumshughulisha kila mmoja wetu na siasa. 

Siasa ipo majumbani, siasa ipo barazani, siasa ipo makazini, siasa ipo mitaani, 

siasa ipo kanisani, siasa ipo misikitini almuradi siasa wee siasa wee. Ilifika wakati 

majirani walishindwa kuzikana kwa sababu ya siasa, ndugu kukhasimiana kwa 

sababu ya siasa.

Wanasiasa wakajisahau wakiona muradi umepatikana kila ikizungumzwa siasa 

kila kona wao huchekelea na kuendelea na siasa yao bila ya kujali siasa 

inayoendelea kwengine.

Siasa hii ya mitaani sasa imekuwa. Mitaani imekuwa hakuwatoshi tena hasa baada 

ya kukosa sehemu ya kutoa joto lao tokea vyama viwili vikuu vya siasa kuamua 

kuacha tofauti zao za kisiasa walipounda serikali ya umoja wa kitaifa.

Vijana wengi  hawana ajira, serikali imeshindwa kujifunza jinsi Uingereza ilivyoweza 

kuwadhibiti vijana wake angalau kwa waliokuwa hawana ajira kuwapatia Misaada 

( Benefits)  wajikimu wakati wakitafuta ajira.

Vijana wengi mitaani ambao ndiyo asilimia kubwa ya wakaazi hawana 

vivutio vya kuwapumbaza haswa siku za mapumziko kama ilivyo Uingereza 

ambapo wamewekeza katika michezo kwa kiasi kikubwa wakiwa na malengo yao.   

Vijana hawa huishia vijiweni na mwishowe kujiundia vikundi vya kihuni kama 

ubaya ubaya, mbwa mwitu, kimya kimya na kutishia jina zuri la Zanzibar pamoja 

na sifa yake kuwa visiwa vya amani. Wengine, Mola awarehemu, kujiingiza katika 

madawa ya kulevya.

Athari za kujionea mambo yanayofanyika katika nchi za nje iwe kwenye televisheni 

au kwenye mitandao imewaingia vijana wetu mpaka sasa kukitokea fujo la aina 

yoyote basi , usalama, amani hupotea haraka sana, maduka kuvunjwa, mali 

kuporwa, vifaa kuharibiwa kwa kile ambacho vijana wamekuwa wakikisubiri tu 

kitokee na wao kuanza kazi zao. Mambo haya yalikuwa hayapo Zanzibar, yametokea 

wapi? Hili ndilo la kujiuliza kama ni Serikali.

Hivi ni kweli wafuasi wa uamsho ndio wanaovunja Baa na kisha kuonekana 

wakigida bia na ulevi hadharani?, Hivi ni kweli wafuasi wa uamsho ndio 

waliokwenda kuitia moto maskani mama ya kisonge?, Hivi ni kweli wafuasi 

wa uamsho ndio wanaoweka vizuizi katika barabara na kisha kuwapora watu kwa 

nguvu? Hivi ni kweli wafuasi wa uamsho ndio waliomkamata na kumkata mapanga 

askari wa FFU?

Masuala yote majibu yake yapo kwa suala la kimsingi la serikali kushindwa kuwa 

na mfumo wa kuwajengea msingi mzuri kundi la vijana wanaotegemewa kuwa 

taifa la kesho. Serikali imevuna ilichokipanda.

Yaliyojiri mwezi wa tano mwaka huu wakati mmoja wa viongozi wa Uamsho 

alipokamatwa na Polisi na kuwekwa ndani iliigharimu sana serikali kwa jina la 

Zanzibar kutiwa doa, kutumika vyombo vya Dola katika kuleta utulivu na tuliamini 

matokeo ya vurugu zile yalikuwa ni fundisho kwa Serikali, Polisi na Uamsho 

yenyewe ambayo ilithibitisha kutohusika na vurugu zile moja kwa moja.

Miezi mitano baadae imeonekana kwamba vyombo hivi ima vimefeli katika 

mtihani wake uliopita au kimeingia kidudu mtu aliyetaka kujaribu kuirejesha ile 

hali ambayo Wazanzibari wengi wanaopenda amani na utulivu wa  nchi yao wanaiona 

gharama yake kwa vitendo. Kitendo cha kutekwa nyara mmoja katika viongozi wa 

uamsho na kuchukuliwa kusikojulikana kimeibua yaliyoibuka kama ilivyokuwa mwezi 

wa tano. Mara hii tu angalau makanisa hayakuchomwa au kuharibiwa.

Baada ya siku tatu kiongozi kaonekana na tumesikia kauli yake yaliyojiri wakati 

alipotekwa nyara na  akihojiwa. Kwa kuwa kauli hizi ni za upande mmoja na 

zitazokosa ushuhuda wa upande wa pili zitabakia kwenye miono na maoni tofauti 

kwa wenye kuzisikia.

Uamsho wanapaswa kujiangalia tena na kurudi mezani kujitathmini kwa 

nia zao njema walizonazo na mazingira au halisi iliyopo na njia zao 

wanazozitumia hasa ukiangalia matukio yenyewe yanavyonasibishwa na Uamsho 

kwa kuwa tu hisia zinatufanya tuamini hivyo.

Hali ya Zanzibar kwa sasa ni tete sana, tupo katika hatua muhimu ya kukusanya 

maoni juu ya Katiba mpya. Hali kama hii itaakisi mawazo, fikra na maoni ya 

wachangiaji na hivyo kupelekea kupata mawazo yaliyojaa hisia zaidi kuliko hali halisi

Uamsho ina takriban miaka kumi tokea kuanzishwa kwake.  miaka kumi ni 

muda mzuri wa kujifanyia tathmini yakinifu.Alhamdulillah Imekuwa ikifanya harakati 

nyingi zenye kuleta tija kubwa kwa Waislamu na nchi kwa ujumla kama kushiriki 

kikamilifu katika kuunganisha wananchi wa visiwa hivi waondokane na tofauti 

za kisiasa na hatimaye kuzaliwa serikali ya umoja wa kitaifa.

Ila Uislamu ni dini ya amani kama zilivyo baadhi ya dini nyingine, matendo maovu 

ya wachache yanaharibu taswira ya  Uamsho yenyewe kwanza na baya zaidi 

kuharibu taswira ya Uislamu kwa ujumla.

Uislamu ndio unaopigwa vita na si Uamsho kama inavyoonekana kwasababu 

ya kupelekea waislamu na uislamu kuingizwa na kujumuishwa kwenye kapu 

moja la mambo mabaya.

Mimi binafsi ninakataa katakata kwamba vurugu zilizotokea zimefanywa 

na wafuasi wa Uamsho, hawa ni wahuni tu wanatumia fursa na mwanya wanaopewa 

na Uamsho katika harakati zake. Mfuasi wa uamsho hana definition ni nani ni 

mwanachama (card holder) supporter ( anayewaunga mkono), sympathiser ni 

nani hivyo mtu yeyote anaweza kujinasibu na kujilabu kwamba mimi ni Uamsho.

Kwa kuutendea haki Uislamu, nadhani iko haja kwa Uamsho kujaribu kukaa chini 

ni kutafakari pamoja na kujitathmini katika mwenendo wa matukio yanayotokea 

hapa nchini na jinsi jamii iliyokosa maadili sahihi ya malezi na makuzi inavyojidhihirisha 

wakati wa vurugu na fujo.

Chanzo: ZanZews