Mgombea udiwani Kahama atimka CCM.

  Adaiwa kuchukua fomu za vyama viwili tofauti vya CCM na ACT- Wazalendo ili kuwania udiwani.

ACT- Wazalendo.

Aliyekuwa mwenyekiti wa kitongoji cha Mhongolo Mashariki, wilayani hapa kwa tiketi ya Chama Cha Mapinduzi (CCM), Elias Chuma, aliyeshindwa kura ya maoni ya udiwani hivi karibuni, amejivua uanachama wa chama hicho.

 

Kwa mujibu wa Chuma, amechukua uamuzi huo kwa kile alichodai kuhujumiwa na baadhi ya wanachama na viongozi wa CCM  kwa kumtuhumu mambo mbalimbali ikiwamo kudaiwa kuchukua fomu za vyama viwili tofauti vya CCM na ACT- Wazalendo ili kuwania udiwani hali iliyojenga chuki kwa wanachama na kuamua kutomchagua.

 

Alisema kutokana na hali hiyo ameamua kujivua rasmi uanachama wa CCM na kwamba atajiunga na chama kingine ambacho hata hivyo hakukitaja jina ili aendelee kuwatumikia wakazi wa kata hiyo ya Mhongolo.

 

“Nawashukuru wanachama kwa kumpatia ushirikiano hafifu katika mchakato wa kura za maoni kutokana na kupandikiza chuki,” alisema.

 

Akizungumzia madai hayo ya Chuma, Katibu wa CCM Kata ya Mhongolo, Lucas Ntwana, alisema ofisi yake haijapokea taarifa yoyote za mwanachama kujivua uanachama na kujiunga na chama kingine.

 

Hata hivyo, alisema ana taarifa za madai kuwa mwanachama huyo alichukua fomu mbili za vyama tofauti ili kugombea udiwani.

CHANZO: NIPASHE