BAADHI YA WATz WA NJE WAISHUKURU SERIKALI KWA HADHI MAALUMU!

*BARUA YA WAZI KWA SERIKALI *

"Kwanza tunaishukuru serikali kwa kusikia kilio cha muda mrefu cha wanadiaspora wa Tanzania na kuamua kukubali kutoa Hadhi Maalumu ambayo itatoa haki za urai wa Tanzania kwa wazawa wa Tanzania waliopoteza uraia wa Tanzania kwa kuchukua uraia nje ya nchi.

Baada ya tamko la rais kuhusu kutolewa kwa Hadhi Maalumu kumetokea kundi la wanadiaspora ambao kwa sababu zao za binafsi ikiwemo upinzani kwa serikali na kutojali maslahi ya watanzania na Tanzania kwa ujumla, wameamua kujikusanya na wanataka wapeleke kesi mahakamani kudai uraia pacha. Hili likiwa ni jaribio la dhahiri la kukwamisha Hadhi Maalumu isitolewe.

Uraia pacha duniani kote si suala la serikali kulazimishwa. Kuna nchi nyingi kutokana na sababu zao hazikubali uraia pacha. Hata hiyo haki ya uraia wa kuzaliwa ni sheria ya nchi. Kuna nchi nyingine mtoto akizaliwa huko hupewa uraia, na kuna nchi nyingine hapewi uraia wa kuzaliwa.

Wazawa wa Tanzania hatukunyimwa haki hii, wote tumepewa uraia wa Tanzania tulipozaliwa Tanzania. Hata hivyo haki hii haimzuii mtu yeyote duniani kunyang'awa uraia wa kuzaliwa iwapo atakiuka sheria za nchi. Hata anaezaliwa Marekani huweza kupoteza uraia wa kuzaliwa iwapo ataukana uraia wa Marekani au kwa kujiunga na jeshi dhidi ya Marekani, kula kiapo cha utii kwa nchi nyingine au akifanya uhaini.

Leo hii duniani, kama ilivyo kwa Tanzania, nchi nyingi sana na nyingine ziko Ulaya ikiwemo Holland, raia wao akichukua uraia wa nje anapoteza uraia wake wa kuzaliwa.

Zaidi ya hayo Hadhi Maalumu ni muafaka kati ya mahitaji yetu sisi wanadiaspora na matakwa ya serikali. Sisi wanadiaspora tutapata haki za uzawa wa Tanzania tulizozipoteza, na serikali itaendelea kuilinda sera yake kukataa uraia pacha.

Uraia pacha una madhara makubwa kwa Tanzania.

1. Tanzania ina wawekezaji wengi wa kigeni ambao tayari wapo nchini zaidi ya miaka kumi. Tanzania ikitoa uraia pacha ni rahisi kwa wawekezaji hao kutimiza vigezo vya kuomba uraia pacha na wakiupata hawatalazimika kulipa kodi za uwekezaji wala kugawana faida na serikali. Hiyo itakuwa ni hasara kwa serikali na taifa kwa ujumla.

2. Nchini Tanzania, tayari matajiri wakubwa wana asili ya nje ya nchi. Na inaminika wanatumia paspoti za nje kwa siri kwa sababu Tanzania hairuhusu uraia pacha. Tanzania ikiruhusu uraia pacha, hakutakuwa na kigezo cha kuwazuia matajiri hawa kutaja uraia wao wa nje na wanaweza kuhamisha mali nje ya nchi bila ya kificho.

3. Tanzania imezungukwa na nchi zenye uhaba wa ardhi aidha kwa udogo wa hizo nchi (Rwanda) au kwa ardhi za hizo nchi kuhodhiwa na matajiri wachache(Kenya). Tumeona mfano hai, wamasai wa Loliondo kufungua kesi Kenya. Ni wazi Tanzania ikiruhusu uraia pacha raia wa nchi kigeni hasa wa mipakani watatafuta namna ya kupata uraia Tanzania. Hata kama ni kwa kusubiri miaka 10 ya kuishi ndani ya Tanzania.

4. Kuna suala la wakimbizi vilevile, Kongo, Rwanda na Burundi, uraia pacha utakuwa na manufaa zaidi kwao kuliko hata sisi wanadiaspora tunaoupigania.

5. Tanzania ina tatizo la ajira, wamachinga na wasio na kazi ni wengi. Mwisho wa siku uraia pacha maana yake ni kualika wagani nchini.

Hiki si kitu cha kuiga Ulaya, Canada na Marekani. Kwa mfano Canada ina ukubwa kama mara kumi ya Tanzania, lakini ina watu watu kama nusu tu ya watanzania. Wanahitaji watu. Marekani kila mwaka inachezesha viza za bahati nasibu kuchukua wageni waingie kwao.

Kuna wanaouliza mbona majirani zetu wametoa uraia pacha? tusisahau Africa ya mashariki Tanzania ni nchi tajiri kuliko zote kwa maliasili hasa ardhi. Bado tuna ardhi zisizopimwa.

Ukiyafikiria yote haya, hii Hadhi Maalumu sio tu ina manufaa kwa serikali na watanzania, ina manufaa hata kwetu sisi wanadiaspora wenyewe kwa sababu inatulinda tusipate ushindani na wageni katika kupata haki za uraia wa Tanzania.

Wanaodai uraia pacha kwa matamanio yao ya kumiliki hati mbili za kusafiria hawafikirii yote haya. Wanasema itakuwa ni uraia pacha kwa wazawa tu wa Tanzania lakini hawasemi haya;

1. Wageni wakitimiza vigezo vya kupata uraia pacha watanyimwaje.

2. Matajiri wa kitanzania wenye asili ya nje wakichukua uraia wa kwao au wa nje na kuhamisha mali bila ya kificho watazuiwaje.

3. Na hizo sheria za kuwapa wazawa uraia pacha na kuwanyima wageni zinatekelezeka vipi ukizingatia Tanzania haina teknolojia kama za Ulaya kwenye kudhibiti data. Na pia ina matatizo ya rushwa na weledi wa utendaji kazi.

Kwa kuzingatia haya yote sisi wanadiaspora ambao tumeridhika na kutolewa kwa Hadhi Maalumu tunaiomba serikali ya Tanzania isituchanganye na hao wanaotaka kufungua kesi mahakamani kudai uraia pacha. Hawawakilishi wanadiaspora wote wa Tanzania. Vilevile tunaiomba serikali iendelee na zoezi la utoaji Hadhi Maalumu ili tuweze kushiriki kikamilifu kuijenga nchi yetu ya uzawa Tanzania".

Also read: TANZANIANS ABROAD ARE UNITING TO FIGHT FOR THEIR INALIENABLE RIGHT!

CAUTION: Any opinion expressed in this blog does not necessarily reflect the view of the blog's owner. 

                   The above article has been quoted from the HADHI MAALUMU DIASPORA TZ platform.